10/11 一家子兒咕咕叫
詹京霖導演，伊用比鳥仔來比喻人生，透過失蹤真濟年的粉鳥「043」轉來厝裡這件代誌做起頭，去講痟比鳥的老爸阿欽，佮一傢伙仔面對後生失蹤集體創傷的回憶。導演分享講：「阮這部戲，一開始確定的演員就是比鳥」，佇電影內裡，游安順、李夢苡樺、胡智強攏佮粉鳥有精彩的對戲。電影裡深刻描寫飼粉鳥仔阿欽（游安順搬演），就親像是台灣二戰了後出世嬰仔潮查埔人的一種代表，逐擺面對粉鳥放飛出去了，其實大多數攏會消失。這就可比人生自一窟死水，掀起波動的魔幻時刻，人終其尾會想起來，到底啥物是重要的。
10/18 湯道
溫泉旅館的大漢後生（生田斗真搬演），少年時無愛繼承家裡的事業，伊孤一人佇大都市內做建築師，想拚家己的夢想。但現實真正殘酷，伊拚袂過大都市的壓力，只好轉來去故鄉。煞毋知這時厝裡的「丸金溫泉」，已經予三弟（濱田岳搬演）繼承。老大看厝裡的生意無好，想空想縫欲來「改造」溫泉經營，煞來佮三弟的理念相衝突。到底這吵吵鬧鬧的一家伙人，敢有法度改變溫泉的生意？
10/25 神人之家
「原生家庭是人生中上重要的課題」。這句話對盧盈良導演來講，更加是按呢，𪜶兜有欲似「雪文戲」彼款的譀古。伊老爸得一種「一工無跋筊那似會死的病」，伊阿母認命到一世人無想過愛改變。小可仔特殊的阿兄「阿志」，自細漢有感應的體質，會替信眾辦代誌，指點迷津。但是阿良導演誠迷惘，阿兄幫忙遐濟信眾，煞對厝裡的困境親像一點無步。「神明到底佇想啥物？」懷抱這款的迷惘，阿良開始用鏡頭記錄厝裡的故事。
