2/28 超級大國民 導演：萬仁
蹛佇療養院的老查埔人定定做惡夢，伊面腔總是驚惶，若小喘氣就會疼甲吼出聲。佇心臟病發作彼暝，伊夢著1950 年代，少年時因為參加讀冊會予人掠去關十外冬，伊閣夢著朋友因為讀禁書予人銃殺，無人敢共收死體。四十外冬過去，伊的生活予監牢之災舞甲抾捔，厝內人嘛因為政治犯的汙名受盡拖磨。一事無成的人生，只賰揣著老同學的墓共拈一枝香，是伊最後的向望。
3/14 無言的山丘 導演：王童
佇 1920 年日本時代，兩个田佃仔囝逃離地主的剝削，到金瓜石探礦挖金仔，想欲拚翻轉身。毋過遐毋是天堂，挖金仔的生理是食人夠夠，烏道白道無講理，干焦利益是爹親。佇人肉鹹鹹的社會，兄弟仔的靈魂、肉體，甚至愛情，攏總袂得家己做主。王童導演以本片提著 1992 年金馬獎最佳導演,呈現予咱的觀眾。
3/28 沙河悲歌 導演：張志勇
改編自寫實主義精神的作家七等生仝名作品。時間是1960 年代的戰後台灣，彼時社會變化誠大，經濟稀微的農村有一種普遍的散赤。但是普通人兜出世的文雄，無愛揣一般「正常」的頭路、娶某生囝。伊為欲追求要意的音樂藝術，走去酒間仔、歌仔戲團演奏音樂，但是煞予爸母看做袂上腳。佇藝術藝術追求精神自由，佮實際生活的困苦之間，文雄決心欲反抗，行上彼條有去無回的藝術路。
